Mit́ diń iń hõ

Pạńci dẽ̠ga ke̠te̠ć kate̠ć,

Photo credit: Markus Hembrom's facebook wall

Ato̠ ghạriạ to̠l kate̠ć,
Ce̠t́ le̠ka jạnum daṛe̠ re̠ nạṛi to̠lo̠ḱ,
Ce̠t́ le̠ka jiw̃i são te̠ jiw̃i to̠lo̠ḱ.
Dạṅguạ jio̠ń cuṭi se̠ńge̠l le̠ka je̠re̠t́ kate̠ć.
Ho̠riń sab le̠da,
Ḍahariń ńam le̠da.
Ṭhe̠ńga re̠ japaḱ kate̠ć.

O̠ṛaḱ mutul kho̠ć rạsi ato̠ń ko̠yo̠ḱ le̠da.
Mãńjhi ko̠re̠ń hudiń kuṛi,
Dãnḍa re̠ kãḍa he̠rme̠t́ kate̠ć,
Gaḍa dhiṕ kho̠ne̠ phe̠do̠ḱ kań.

Ḍahar re̠ phuḍu caike̠l tińgu kate̠ć,
Diku ko̠ṛai tạńgi aḍe̠.
Purub mo̠cạt́ re̠n haṛamba,
Diku ko̠ṛa cuṭiye̠ ko̠ye̠ kan.
Cho̠r sạlạy dạw e̠na,
Se̠ńge̠l dhũạ lusupũḍũ,
Khe̠ṭe̠ khe̠ṭe̠ lańda re̠,
At́ e̠na haṛambaoḱ sạri mũṭhạń.
O̠ṛaḱ mũtul kho̠ć ińaḱ mẽt́ hõ dũńhũ e̠na.

Ko̠yo̠ḱ ruạṛ kidạń dạkhiń nakha,
mũńdri ko̠re̠n lańṭa gidrạ,
Iskul be̠go̠r kateć,
Kũńci caka gạḍi,
Hũndhạo e̠dai dhuṛi ḍahar ḍahar te̠.

Utạr re̠ cũńdriń tako̠aḱ o̠ṛaḱ kho̠ć,
Re̠ta banam ar diku ro̠ṛ dạṛao dạṛao,
Rutur tarko̠ḱ tiń,
Tarko̠ḱ kan tiń jiw̃i mo̠ń.
Pạorạ so̠te̠ at́ e̠ń,
Kạpurmuli baha so̠ tiń.

Ińaḱ o̠ṛaḱ mũtul o̠ṛaḱ ge̠ tãhẽ eń.
Jiw̃i rạput́ no̠a ńe̠l,
Ce̠daḱ iń ńe̠ljo̠ṅ?

O̠lo̠ḱ paṛhaoḱ iń cit́ ke̠da,
Ãr hõ tinạḱ ińaḱ cit́,
So̠maj ghạriạ to̠l bạṅ cit́ le̠t́,
Bạṅ baḍai ińaḱ upuṛum.
Iń mạ̃ń bhabnaḱ kan,
Ińaḱ bhabna.
Ce̠ka te̠ṅ to̠l tiń?
Ińaḱ jio̠n ḍahar.

Nijạḱ kusi lạgit́
At́ kidạń pạris,
Ho̠ṛko̠ṅ uḍuḱ ako̠ kań,
Ńe̠l tiń pe̠--
Araḱ gạḍi ar so̠na saṅkha mũdạm.
Khiṭi khiṭiń lańda e̠da,
Ato̠ o̠ṛaḱ ńe̠l te̠,
Iń mãń de̠ć akan,
Laṭu do̠lań o̠ṛaḱ re̠.

Mit́ diń, mit́ diń
Ãm hõ̠m disaya,
Ce̠t́ iń at́ ke̠da
Ce̠t́ ńam lạgit́.

Mit́ diń iń hõ
Ape̠ le̠ka do̠ baṅ.
So̠maj iń ńe̠laḱ,
Ńe̠laṅ ińaḱ upuṛum.